قازاقستان رەسپۋبليكاسىنىڭ مەملەكەتتىك حاتشىسى گۇلشارا ابدىقالىقوۆا «جاس وتان» جاستار قاناتىنىڭ IV سەزى اياسىندا وتكەن «جاڭا الەمگە جول سالامىز» اتتى گالا-فورۋمعا قاتىستى, دەپ حابارلايدى اقوردانىڭ ءباسپاسوز قىزمەتى.
گالا-فورۋمعا 1500-دەن استام جاستار وكىلدەرى, سونداي-اق پارلامەنت دەپۋتاتتارى, مەملەكەتتىك ورگاندار مەن «نۇر وتان» پارتياسىنىڭ باسشىلىعى جانە قالىڭ جۇرتشىلىق قاتىستى.
فورۋمدى اشقان گۇلشارا ابدىقالىقوۆا ەلباسى نۇرسۇلتان ءابىش ۇلى نازارباەۆتىڭ قۇتتىقتاۋ ءسوزىن وقىپ بەردى.
وندا «جاس وتان» مەملەكەت باسشىسىنىڭ بارلىق باستامالارى مەن ستراتەگيالىق جوسپارلارىنىڭ سەنىمدى تىرەگىنە اينالعانى, بۇل بەدەلدى ۇيىم مىڭداعان ءبىلىمدى دە بەلسەندى جاستاردىڭ, قازاقستاننىڭ ناعىز پاتريوتتارىنىڭ باسىن بىرىكتىرىپ وتىرعانى اتاپ وتىلگەن.
تاۋەلسىزدىكتىڭ العاشقى كۇندەرىنەن باستاپ جاستار ماسەلەسى مەملەكەتتىڭ ۇدايى نازارىندا. قازىر بۇكىل الەم ءتورتىنشى ونەركاسىپتىك رەۆوليۋتسيا داۋىرىنە قادام باستى. ۇزاق مەرزىمدى ماقساتتارعا قول جەتكىزۋ ءۇشىن ەلدە ساياسي, ەكونوميكالىق, رۋحاني جانە الەۋمەتتىك جاڭعىرۋلار قولعا الىندى. «بولاشاققا باعدار: رۋحاني جاڭعىرۋ» اتتى باعدارلامالىق ماقالادا ءححى عاسىرداعى ۇلتتىق سانا تۋرالى ايتىلىپ, تاياۋ جىلداردا قولعا الۋدى قاجەت ەتەتىن مىندەتتەرگە ەرەكشە نازار اۋدارىلدى. ولار: لاتىن الىپبيىنە كوشۋ, «تسيفرلىق قازاقستان» باعدارلاماسى, ءۇش تىلدە ءبىلىم بەرۋ جانە ت.ب. بۇل ءۇشىن ساپالى ءبىلىم بەرۋگە جانە بىلىكتىلىگى جوعارى جاس ماماندار دايارلاۋعا ەرەكشە كوڭىل ءبولۋ كەرەك. «جاڭا الەمگە جول سالامىز» دەگەن سەزد اتاۋى قازاقستان جاستارىنىڭ جاڭا ءبىلىم مەن يننوۆاتسياعا دەگەن ۇمتىلىسىن اڭعارتادى.
پرەزيدەنت جاستاردى جان-جاقتى دامۋعا – سپورتپەن, ونەرمەن اينالىسۋعا, شەت تىلدەرىن ۇيرەنۋگە, وتاندىق جانە الەمدىك ادەبيەتتىڭ باي مۇراسىن تانىپ-بىلۋگە, ەڭ باستىسى, الەمدىك دەڭگەيدەگى كاسىبي مامان بولۋعا شاقىردى.
سەزد العاش رەت VR (virtual reality) فورماتىندا كورسەتىلدى. بۇل تەحنولوگيا كەز كەلگەن ينتەرنەت پايدالانۋشىسىنا زالداعى كورىنىستىڭ بارلىعىن 360 گرادۋس اينالاسىندا كورۋىنە مۇمكىندىك بەرەدى.
«رۋحاني جاڭعىرۋ», «تسيفرلىق قازاقستان», «قازاقستاندا جاسالعان», ء«بىلىم. عىلىم. يننوۆاتسيا», «سالاماتتى ۇلت» ءتارىزدى 5 سەكتسيالىق باعىت بويىنشا تاقىرىپتىق جوبالار ازىرلەندى.
«جاس وتان» جاستار قاناتىنىڭ IV سەزى سانانى جاڭعىرتۋعا جانە قازاقستان جاستارىنىڭ جاھاندىق باسەكەگە قابىلەتتى بولۋىنا باعىتتالعان جاستار ساياساتىنىڭ جاڭا فورماتى اياسىندا وتكىزىلدى.